life is beautiful

Story by GanGiaoLong

已经唔记得几时，几月，几日。讲古佬遇到雀仔。已经唔记得雀仔点样慢慢咁走入讲古佬的生命。

有一日，一个好平凡嘅讲古佬，係街上遇到只好靓、好得意、唱歌好好听嘅雀仔。只雀仔係树上休息，讲古佬行过，俾只雀仔吸引住，望咗好耐，企喺树底望咗好耐。雀仔都有留意到讲古佬一直係度望住佢。之后，讲古佬继续行佢平时行嘅路，一条好直、好平凡嘅路，一条佢每日都行嘅路。当佢行紧嘅时候，一直喺度捻住只雀仔，只雀仔一直喺佢脑海入便飞来飞去。

第二日，讲古佬好似平时咁行佢要行嘅路。当佢经过棵树嘅时候，只雀仔又出现，係树上唱紧歌。讲古佬停咗脚步，喺树下听雀仔唱歌。听咗好耐，听到唔舍得走，
一直係度听，直到雀仔飞走，佢先继续行佢嘅路。唔知点解，讲古佬开始挂住只雀仔，好想好快可以见到只雀仔，好期待听日嘅来临，希望可以再睇到雀仔係树上唱歌。

第三日，讲古佬比平时早出门，因为佢好心急要见只雀仔。当佢行到棵树，只雀仔真喺係度，真喺好靓。讲古佬好耐都无咁开心过，唔通只雀仔识法术？可以带D欢乐俾人？只雀仔依然係度唱歌，讲古佬依然係度听。听咗好耐，到最后，讲古佬做咗个决定。佢想伸只手出来，希望只雀仔会飞落来，企係佢嘅手度，唱歌俾佢听。

讲古佬捻咗好耐，犹疑咗好耐，佢惊只雀仔唔会理佢，唔会飞落来。不过，佢想试下。结果佢伸咗只手出来，睇住只雀仔对翼係度郁，好似想飞咁。雀仔终于展开对翼，飞咗起来，对住讲古佬嘅方向飞去，慢慢咁飞到佢只手度。讲古佬好紧张，心跳得好快，佢从来未试过呢种感觉，好似得到全世界咁。

但系只雀仔无再唱歌，佢静静咁，郁都唔郁企係讲古佬只手度，眼定定咁望住讲古佬。好耐好耐，讲古佬同只雀仔都无出声。讲古佬决定发挥佢嘅专长，讲古仔。佢想讲古仔俾雀仔听，开始讲，讲下讲下，只雀仔越听越兴奋，係讲古佬只手度跳舞，好似好开心，好中意讲古佬D古仔。于是，讲古佬就越讲越有满足感，佢觉得好幸福，因为只雀仔识得欣赏佢D古仔。

古仔讲完，雀仔飞开讲古佬只手，飞係半空，准备飞去第二度。係半空，雀仔望住讲古佬，讲古佬对眼亦都无离开过只雀仔，好似係度问紧只雀仔，几时会再见。可惜只雀仔唔识讲嘢，佢飞走咗。

雀仔飞走之后，讲古佬又继续行佢嘅路，但系今日佢行得好快，脚步好轻，因为佢想快快行完，快快到听日。

听朝起身，讲古佬出门，去到棵树度，只雀仔无係，讲古佬有D失望。但系佢捻到可能只雀仔未睡醒，佢要係度等，等到雀仔飞过来。等咗好耐，终于见到只雀仔。雀仔无飞到去树上，佢飞到讲古佬嘅膊头，望住讲古佬。佢嘅眼神，好似想话俾讲古佬知，好想听古仔。讲古佬亦都好似明白只雀仔，开始讲起古仔。雀仔听紧古仔好专心，讲古佬亦都俾足心机去讲每一个古仔，佢唔想令雀仔失望。佢想用D古仔吸引只雀仔每日都飞过来，飞到佢膊头。佢好紧张，唔想讲错。讲古佬好想只雀仔开开心心咁飞来，开开心心咁飞走。（待续）